തിരുവനന്തപുരം: 2026ലെ മുഖ്യമന്ത്രിയുടെ പൊലീസ് മെഡലുകള് പ്രഖ്യാപിച്ചു. സംസ്ഥാനത്തെ വിവിധ റാങ്കുകളിലുള്ള 281 പൊലീസുദ്യോഗസ്ഥരാണ് ഇത്തവണ മെഡലിന് അര്ഹരായത്. സേവനം, സമര്പ്പണം, പ്രതിബദ്ധത, മികവ് എന്നിവ പരിഗണിച്ചാണ് പുരസ്കാരത്തിന് ഉദ്യോഗസ്ഥരെ തെരഞ്ഞെടുത്തത്.
സാധാരണയായി സ്വാതന്ത്ര്യദിനത്തിന് തലേന്നാണ് മുഖ്യമന്ത്രിയുടെ പൊലീസ് മെഡല് പട്ടിക പ്രഖ്യാപിക്കുന്നത്. എന്നാല് ഇത്തവണ പട്ടിക പുറത്തുവിട്ടത് രാത്രി വൈകിയായിരുന്നു. പട്ടികയുടെ പരിശോധന പൂര്ത്തിയാക്കാന് വൈകിയതാണ് പ്രഖ്യാപനം വൈകാന് കാരണമെന്നാണ് വിവരം.
സംസ്ഥാന പൊലീസ് മേധാവിയുടെയും സംസ്ഥാനതല സ്ക്രീനിങ് സമിതിയുടെയും ശുപാര്ശ പരിഗണിച്ചാണ് മെഡലിന് അര്ഹരായവരെ തെരഞ്ഞെടുത്തത്. അസി. പൊലീസ് കമ്മീഷണര്, ഇന്സ്പെക്ടര്, സബ് ഇന്സ്പെക്ടര്, അസി. സബ് ഇന്സ്പെക്ടര്, സീനിയര് സിവില് പൊലീസ് ഓഫീസര്, സിവില് പൊലീസ് ഓഫീസര് തുടങ്ങിയ വിവിധ റാങ്കുകളിലുള്ള ഉദ്യോഗസ്ഥര് പട്ടികയിലുണ്ട്. വനിതാ പൊലീസ് ഉദ്യോഗസ്ഥരും പുരസ്കാരത്തിന് അര്ഹരായിട്ടുണ്ട്.
അതേസമയം, പട്ടികയുടെ പരിശോധനയും അന്തിമ തീരുമാനവും സമയബന്ധിതമായി പൂര്ത്തിയാക്കുന്നതില് ആഭ്യന്തര വകുപ്പിന്റെ ഭാഗത്ത് വീഴ്ചയുണ്ടായെന്നാണ് റിപ്പോര്ട്ട്. പൊലീസ് ആസ്ഥാനത്ത് നിന്ന് മെഡലിന് അര്ഹരായവരുടെ പട്ടിക നേരത്തെ കൈമാറിയിരുന്നെങ്കിലും അന്തിമ നടപടികള് വൈകുകയായിരുന്നു.
രാഷ്ട്രപതിയുടെ പൊലീസ് മെഡലിലും കേരളത്തിന് അംഗീകാരം
2026ലെ രാഷ്ട്രപതിയുടെ പൊലീസ് മെഡലുകളിലും കേരളത്തില് നിന്ന് ഒമ്പത് പേര് ഇടം നേടി. എസ്.പി. ശശിധരന് വിശിഷ്ട സേവനത്തിനുള്ള മെഡല് ലഭിച്ചു. സ്വര്ണക്കൊള്ള, നരബലി തുടങ്ങിയ കേസുകളുടെ അന്വേഷണത്തില് പ്രവര്ത്തിച്ച ഉദ്യോഗസ്ഥനാണ് ശശിധരന്.
ഐജി രാജ്പാല് മീണ, എസ്.പി. ബിനു രാമകൃഷ്ണപിള്ള, ഡിവൈ.എസ്.പി. വി.ആര്. രവികുമാര്, എസ്.പി. ജി. ഉജ്ജ്വല് കുമാര്, ഡിവൈ.എസ്.പി. എസ്.എസ്. സുരേഷ് ബാബു എന്നിവര്ക്കും സ്തുത്യര്ഹ സേവനത്തിനുള്ള അംഗീകാരം ലഭിച്ചു. ഫയര് സര്വീസില് നിന്ന് രാജേന്ദ്രന് നായര്, സെബാസ്റ്റ്യന് ജോസഫ് എന്നിവരും പുരസ്കാരത്തിന് അര്ഹരായി.