ന്യൂഡൽഹി: വന്ദേമാതരം ആലാപനവുമായി ബന്ധപ്പെട്ട വിവാദങ്ങൾക്കിടെ ഡൽഹിയിലെ എഐസിസി ആസ്ഥാനത്ത് സ്വാതന്ത്ര്യദിനാഘോഷത്തിനിടെ ഗാനം പൂർണമായി ആലപിച്ചു. കോൺഗ്രസ് അധ്യക്ഷൻ മല്ലികാർജുൻ ഖാർഗെ, സോണിയ ഗാന്ധി, രാഹുൽ ഗാന്ധി തുടങ്ങിയ നേതാക്കൾ പങ്കെടുത്ത ചടങ്ങിലാണ് നാടകീയ രംഗങ്ങൾ അരങ്ങേറിയത്.
സേവാദൾ നേതൃത്വത്തിലായിരുന്നു എഐസിസി ആസ്ഥാനത്തെ സ്വാതന്ത്ര്യദിനാഘോഷ പരിപാടികൾ. വന്ദേമാതരത്തിന്റെ മുഴുവൻ ഭാഗങ്ങളും ആലപിക്കാൻ തുടങ്ങിയപ്പോൾ നേതാക്കൾ ഇടപെടാൻ ശ്രമിക്കുന്ന ദൃശ്യങ്ങൾ പുറത്തുവന്നു. എന്നാൽ ഗാനാലാപനം തുടരുകയായിരുന്നു.
വന്ദേമാതരത്തിന്റെ ആദ്യ രണ്ട് ചരണങ്ങൾ മാത്രം ആലപിച്ചാൽ മതിയെന്ന നിലപാടാണ് കോൺഗ്രസ് ദേശീയ നേതൃത്വം നേരത്തെ സ്വീകരിച്ചിരുന്നത്. മുഴുവൻ ഭാഗങ്ങളും ആലപിക്കുന്നത് സംബന്ധിച്ച് പാർട്ടിക്കുള്ളിൽ തന്നെ രാഷ്ട്രീയ-ചരിത്രപരമായ വാദപ്രതിവാദങ്ങൾ നിലനിൽക്കുന്നതിനിടെയാണ് എഐസിസി ആസ്ഥാനത്തെ സംഭവം.
സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെ കോൺഗ്രസ് നേതൃത്വത്തിനെതിരെ വിമർശനങ്ങളും ഉയർന്നു. അതേസമയം, എഐസിസി ജനറൽ സെക്രട്ടറി ജയറാം രമേഷ് വന്ദേമാതരം പൂർണമായി ആലപിച്ചതിൽ പ്രശ്നമില്ലെന്നും വിഷയം വിവാദമാക്കേണ്ടതില്ലെന്നും പ്രതികരിച്ചു.
ഓഗസ്റ്റ് 15-ലെ സ്വാതന്ത്ര്യദിനാഘോഷങ്ങളിൽ വന്ദേമാതരം പൂർണമായി ആലപിക്കണമെന്ന നിർദേശം കേന്ദ്രതലത്തിൽ വന്നതിനെ തുടർന്ന് കേരള സർക്കാരും സംസ്ഥാനത്തെ ഔദ്യോഗിക ആഘോഷങ്ങളിൽ ഗാനം പൂർണമായി ആലപിക്കണമെന്ന് നിർദേശിച്ചിരുന്നു.