മുംബൈ: പശ്ചിമേഷ്യയിലെ സംഘർഷം രൂക്ഷമായതിനെ തുടർന്ന് ക്രൂഡ് ഓയിൽ വില ഉയർന്നതോടെ ഇന്ത്യൻ ഓഹരി വിപണിയിൽ കനത്ത വിൽപ്പന സമ്മർദം. സെപ്റ്റംബർ 9ന് രാവിലെ സെൻസെക്സ് 500 പോയിന്റിലധികവും നിഫ്റ്റി 23,500 നിലവാരത്തിന് താഴെയും എത്തിയിരുന്നു.
രാവിലെ 10.01ന് സെൻസെക്സ് 74,954.33 എന്ന നിലയിൽ 0.83 ശതമാനം താഴ്ന്നപ്പോൾ നിഫ്റ്റി 23,474.4 എന്ന നിലയിൽ 0.67 ശതമാനം ഇടിഞ്ഞു. നിഫ്റ്റി ഐ.ടി സൂചികയിൽ ഏകദേശം 3 ശതമാനം ഇടിവ് രേഖപ്പെടുത്തി.
അതിനിടെ അന്താരാഷ്ട്ര വിപണിയിൽ ബ്രെന്റ് ക്രൂഡ് 100 ഡോളറിനോട് അടുത്തെത്തി. സെപ്റ്റംബർ 9ന് ബ്രെന്റ് ക്രൂഡ് ഏകദേശം 99.5 ഡോളർ വരെ ഉയർന്നത് ഇന്ത്യയെ സംബന്ധിച്ചിടത്തോളം ആശങ്ക വർധിപ്പിക്കുന്നു. എണ്ണവില ഉയരുന്നത് ഇറക്കുമതി ചെലവും പണപ്പെരുപ്പ സമ്മർദവും വർധിപ്പിക്കാനുള്ള സാധ്യതയാണ് വിപണിയെ ബാധിക്കുന്നത്.
വിദേശ നിക്ഷേപകരുടെ ഓഹരി വിൽപ്പന, ഐ.ടി ഓഹരികളിലെ ഇടിവ്, പശ്ചിമേഷ്യയിലെ സംഘർഷം, അമേരിക്കൻ പലിശനിരക്കിനെക്കുറിച്ചുള്ള ആശങ്കകൾ എന്നിവയും വിപണിയിലെ സമ്മർദത്തിന് കാരണമായി.